Xuño chegou

Golfo ártabro, provincia da Coruña, Galicia, para os que se deixen levar polos tópicos non lles será suxestión algunha falar do mes de xuño xa que (pobres xentes), pensan que por estas lonxanas terras soamente chove e que as nuves son as únicas cousas que hai  no ceo; nembargantes para min é un mes adorable.

Os días son longos, as noites curtas (polo cal hai que desfrutalas), a temperatura é perfecta, non é abafante nin é fría, o dito, é perfecta. É o mes no cal comezamo-la época das praias; é o mes no cal vivimos a noite bruxa por excelencia, a incrible noite de San Xoan (quen poda que se achege á Coruña a disfrutala en toda a ensenada do Orzán) noite nas que as rachoeiras toman toda Galicia e fan que sexa un facho que ilumina a todo o mundo; é o mes no que os romanos volven a loitar contra os celtas en Lugo. É o mes no que comeza a maxia.

É o mes no que comeza o verán, é un mes que hule a vacacións; é o mes no cal xa se notan as festas patronais galegas; é o mes no que xa comezan as romarías; é o mes no cal en Galicia xa se fan festas gastronómicas (neste intre eu son coma Homer Simpson, ¡a baba cáeme dos beizos!).

Por todo iso, e inda que sexa o principio do mes e eu teña lotes e lotes e máis lotes de traballo na oficina, soamente podo ser optimista ó arrancar co meu querido mes de xuño.

Deixo uns vídeos para que vexades o que é o que vai traer o mes de xuño

¡Saúde!